Gccc-logo.png


მუხლი 141. ხანდაზმულობის ვადის დენის დაწყების ათვლა თავიდან

From Georgian Civil Code Commentary
Jump to: navigation, search

მთავარი პროექტის შესახებ კომენტარის შესახებ ავტორები კონტაქტი

მუხლი 141. ხანდაზმულობის ვადის დენის დაწყების ათვლა თავიდან


გიორგი სვანაძე
ბოლო დამუშავება: 24 დეკემბერი, 2017

თუ შეწყდება ხანდაზმულობის ვადის დენა, მაშინ შეწყვეტამდე განვლილი დრო მხედველობაში არ მიიღება და ვადა დაიწყება თავიდან.



1

ხანდაზმულობის ვადის დენის შეწყვეტას განსაკუთრებული გავლენა აქვს მისი დენის შეწვეტამდე განვლილ დროსთან მიმართებით. კერძოდ, შეწყვეტამდე განვლილი დრო მხედველობაში არ მიიღება და ვადის ათვლა თავიდან იწყება.

ერთ-ერთ საქმეზე „სააპელაციო სასამართლომ მიიჩნია, რომ განხილული სასარჩელო მოთხოვნები ხანდაზმული არ არის, რადგან 2010 წლის 28 მაისს შესრულებული გადახდით (2250 ლარი), რომლითაც ნაწილობრივ ანაზღაურდა დასაქმებულის წინაშე არსებული ვალდებულება, სამოქალაქო კოდექსის 137-ე მუხლის თანახმად, ხანდაზმულობის ვადის დენა შეწყდა, რადგან ვალდებულმა პირმა უფლებამოსილი პირის წინაშე მთლიანი დავალიანების ნაწილის გადახდით აღიარა დასაქმებულის მოთხოვნის არსებობა დავალიანების დანარჩენი ნაწილისადმი. შესაბამისად, ამავე კოდექსის 141-ე მუხლის თანახმად, ხანდაზმულობის ვადის (რომელიც, იმავე კოდექსის 129-ე მუხლის მეორე ნაწილის თანახმად, შეადგენს 3 წელს, როგორც პერიოდულად შესასრულებელ სახელშეკრულებო ვალდებულებაზე) დენა დაიწყო თავიდან.[1]

სხვა საქმეზე სასამართლომ შემდეგი განმარტება გააკეთა: „ზემომითითებული გარემოებები, სამოქალაქო კოდექსის 137-ე მუხლის შესაბამისად, ხანდაზმულობის ვადის დენის შეწყვეტის საფუძველს წარმოადგენს. ამავე კოდექსის 141-ე მუხლის თანახმად, თუ შეწყდა ხანდაზმულობის ვადის დენა, მაშინ შეწყვეტამდე განვლილი დრო მხედველობაში არ მიიღება და ვადის დენა იწყება თავიდან. აქედან გამომდინარე, შპს „[X]-ის“ მიერ განხორციელებული გადახდების პერიოდულობა 3 წელზე ნაკლებია. შესაბამისად, ხანდაზმულობის ვადის ათვლა უნდა დაიწყოს ბოლო გადახდიდან და ვინაიდან, ამ დროიდან სარჩელის წარდგენამდე არ გასულა 3 წელი, სააპელაციო სასამართლოს […] სარჩელი სრულად უნდა დაეკმაყოფილებინა.[2]




  1. საქართველოს უზენაესი სასამართლოს სამოქალაქო, სამეწარმეო და გაკოტრების საქმეთა პალატის 2014 წლის 6 თებერვლის #ას-1196-1138-2014 გადაწყვეტილება.
  2. საქართველოს უზენაესი სასამართლოს სამოქალაქო, სამეწარმეო და გაკოტრების საქმეთა პალატის 2014 წლის 8 მაისის #ას-167-157-2014 გადაწყვეტილება.


დატოვეთ კომენტარი
თქვენ შეგიძლიათ კომენტარის დატოვება ანონიმურად. თუ არ გსურთ ანონიმურობა, გაიარეთ რეგისტრაცია ან ავტორიზაცია.

Retrieved from "http://civilcode.ge/index.php?title=მუხლი_141._ხანდაზმულობის_ვადის_დენის_დაწყების_ათვლა_თავიდან&oldid=2002"