Gccc-logo.png


მუხლი 184. უძრავ ნივთზე საკუთრების უფლების მიტოვება

From Georgian Civil Code Commentary
Jump to: navigation, search

მთავარი პროექტის შესახებ კომენტარის შესახებ ავტორები კონტაქტი

მუხლი 184. უძრავ ნივთზე საკუთრების უფლების მიტოვება


ლევან თოთლაძე
ბოლო დამუშავება: 24 დეკემბერი, 2017

უძრავ ნივთზე საკუთრების ან სხვა უფლების მისატოვებლად აუცილებელია უფლებამოსილი პირის განცხადება ამ უფლების მიტოვების შესახებ, და ამ განცხადების რეგისტრაცია საჯარო რეესტრში. განცხადება უნდა ჩაჰბარდეს რეესტრის სამსახურს. მხოლოდ ამის შემდეგ იძენს უფლების მიტოვების განცხადება სავალდებულო ძალას.

I. ზოგადი დებულებები

1

სათაურის მიუხედავად, ნორმა განსაზღვრავს უძრავ ნივთებზე საკუთრების ან სხვა უფლებების (მაგალითად, აღნაგობა) მიტოვების წესს. გარდა ამ ნორმისა, საკუთრების უფლების შეწყვეტა შესაძლებელია განხორციელდეს ადმინისტრაციული აქტის ან სასამართლოს გადაწყვეტილების საფუძველზე. მაგალითად, თუ ბათილად იქნა ცნობილი ის სამართლებრივი აქტი, რომლის საფუძველზეც განხორციელდა საკუთრების უფლების რეგისტრაცია უძრავ ნივთზე.[1]

II. ჭინაპირობები

2

ნორმის წინაპირობაა საჯარო რეესტრის წინაშე უფლებამოსილი პირის განცხადება უფლების მიტოვების შესახებ. განცხადება, ამ მუხლის გაგებით, არის ცალმხრივი ნების გამოვლენა, რომელიც იწვევს სამართლებრივი ურთიერთობის შეწყვეტას, ამ შემთხვევაში, საკუთრების ან სხვა უფლების მიტოვებას. მართალია, განცხადების ფორმა ნორმის მიხედვით არ არის განსაზღვრული, მაგრამ ნორმა მიუთითებს განცხადების „ჩაბარებაზე“, რაც სიტყვასიტყვითი მნიშვნელობით წერილობით განცხადებას გულისხმობს. გარდა ამისა, შესაძლებელია 3111 მუხლის ანალოგიის გზით გამოყენებაც, რადგან, თუ საკუთრების ან უფლების წარმოშობისათვის საჭიროა გარიგების წერილობითი ფორმა, უფლების შეწყვეტაც იმავე წესს უნდა დაექვემდებაროს.

3

ნორმა არ განსაზღვრავს, თუ ვინ შეიძლება იყოს მიტოვებული უძრავი ნივთის მესაკუთრე. სამოქალაქო კოდექსის ეს ხარვეზი განივრცობა „საჯარო რეესტრის შესახებ“ საქართველოს კანონის 14 IV მუხლის მიხედვით, რომლის თანახმადაც, უძრავ ნივთზე საკუთრების უფლების მიტოვების შემდეგ საკუთრების უფლება გადადის სახელმწიფოზე. ამავე მუხლის მიხედვით, საკუთრების უფლების მიტოვების რეგისტრაცია დასაშვებია, თუ უძრავ ნივთზე სხვა სანივთო უფლება არ არის რეგისტრირებული. ნორმის მიხედვით, უფლების მიტოვების განცხადება სავალდებულო ძალას იძენს განცხადების საჯარო რეესტრში ჩაბარებით. შავალდებულო ძალას იძენს განცხადება იმისათვის, რომ საჯარო რეესტრმა დაიწყოს სარეგისტრაციო წარმოება. ხოლო უძრავ ნივთზე საკუთრების უფლება მიტოვებულად ითვლება საკუთრების უფლების მიტოვების უძრავ ნივთებზე უფლებათა რეესტრში რეგისტრაციის მომენტიდან („საჯარო რეესტრის შესახებ“ საქართველოს კანონის 14 III მუხლი).




  1. შოთაძე, სანივთო სამართალი, 2014, გვ. 165.


დატოვეთ კომენტარი
თქვენ შეგიძლიათ კომენტარის დატოვება ანონიმურად. თუ არ გსურთ ანონიმურობა, გაიარეთ რეგისტრაცია ან ავტორიზაცია.

Retrieved from "http://civilcode.ge/index.php?title=მუხლი_184._უძრავ_ნივთზე_საკუთრების_უფლების_მიტოვება&oldid=1614"