Gccc-logo.png


მუხლი 207. მოთხოვნის დათმობა კანონის ძალით

From Georgian Civil Code Commentary
Jump to: navigation, search

მთავარი პროექტის შესახებ კომენტარის შესახებ ავტორები კონტაქტი

მუხლი 207. მოთხოვნის დათმობა კანონის ძალით


ლევან თოთლაძე
ბოლო დამუშავება: 24 დეკემბერი, 2017

წესები უფლებებსა და მოთხოვნებზე საკუთრების შეძენის შესახებ შესაბამისად გამოიყენება იმ მოთხოვნების დათმობასთან დაკავშირებით, რომლებიც ხორციელდება კანონის ძალით, სასამართლოს ან კომპეტენტური სახელმწიფო ორგანოს გადაწყვეტილების საფუძველზე.

I. ნორმის მიზანი

1

კანონის ძალით მოთხოვნის დათმობის (cessio legis) მიზანია იმ პირის რეგრესული მოთხოვნების განხორციელების უზრუნველყოფა, რომელიც კრედიტორს დააკმაყოფილებს. კანონის ძალით მოთხოვნის დათმობის შემთხვევაში, უფლებები გადადის ipso jure მონაწილე სამართლის სუბიექტების თანხმობის გარეშე.

2

cessio legis-ს სამოქალაქო კოდექსი განსაზღვრავს უშუალოდ საკანონმდებლო შემადგენლობის შესრულების შემთხვევაში. 207-ე მუხლი განსაზღვრავს გარიგების საფუძველზე მოთხოვნის დათმობის წესების გამოყენებას, როდესაც ხორციელდება უფლებებსა და მოთხოვნებზე საკუთრების შეძენა კანონის, სასამართლო გადაწყვეტილებისა და კომპეტენტური სახელმწიფო ორგანოს გადაწყვეტილების საფუძველზე.

II. მოთხოვნის დათმობა კანონის ძალით

3

კანონმა ცალსახად უნდა დაადგინოს, რომ მოთხოვნა კანონის ძალით უნდა გადავიდეს. მაგალითად, კანონის ძალით მოთხოვნის უფლება გადადის მესამე პირის მიერ კრედიტორის დაკმაყოფილების შემთხვევაში (372); ერთ-ერთი სოლიდარული მოვალის მიერ ვალდებულების შესრულების შემთხვევაში მას წარმოეშობა უკუმოთხოვნა დანარჩენ მოვალეთა მიმართ წილთა თანაბრობის კვალობაზე (473 I); თავდების მიერ კრედიტორის დაკმაყოფილების შემთხვევაში მასზე გადადის კრედიტორის მოთხოვნა მოვალის მიმართ (905). უნივერსალური სამართალმემკვიდრეობის შემთხვევაში (1306), 207-ე მუხლი და, მაშასადამე, წესები უფლებებსა და მოთხოვნებზე საკუთრების შეძენის შესახებ არ გამოიყენება.[1] cessio legis არ არის სახეზე, როდესაც კანონი კრედიტორს ავალდებულებს, დათმოს მოთხოვნა.

4

cessio legis-ის შემთხვევაა „მეწარმეთა შესახებ“ საქართველოს კანონის 9 VI მუხლი, რომლის თანახმად, მეწარმე იურიდიული პირების ხელმძღვანელების მიერ საზოგადოებისათვის მიყენებული ზიანის გამო ისინი პასუხს აგებენ სოლიდარულად, პირდაპირ და უშუალოდ და საზოგადოების უარი რეგრესული ანაზღაურების მოთხოვნებზე ბათილია.




  1. Roth/Kieninger, in MüKo BGB, 7. Aufl., 2016, § 412, Rn. 15.


დატოვეთ კომენტარი
თქვენ შეგიძლიათ კომენტარის დატოვება ანონიმურად. თუ არ გსურთ ანონიმურობა, გაიარეთ რეგისტრაცია ან ავტორიზაცია.

Retrieved from "http://civilcode.ge/index.php?title=მუხლი_207._მოთხოვნის_დათმობა_კანონის_ძალით&oldid=1725"