Gccc-logo.png


მუხლი 286. ცნება

From Georgian Civil Code Commentary
Jump to: navigation, search

მთავარი პროექტის შესახებ კომენტარის შესახებ ავტორები კონტაქტი

მუხლი 286. ცნება


გიორგი რუსიაშვილი
ბოლო დამუშავება: 24 დეკემბერი, 2017

1. უძრავი ნივთი შეიძლება ისე იქნეს გამოყენებული (დატვირთული) მოთხოვნის დასაკმაყოფილებლად, რომ უზრუნველყოფილ კრედიტორს მიეცეს უფლება, სხვა კრედიტორებთან შედარებით პირველ რიგში მიიღოს თავისი მოთხოვნის დაკმაყოფილება ამ ნივთის რეალიზაციით ან მის საკუთრებაში გადაცემით (იპოთეკა).

2. იპოთეკა შეიძლება ასევე გამოყენებულ იქნეს სამომავლო ან პირობით მოთხოვნასთან დაკავშირებით, თუ იპოთეკის დადგენის მომენტისათვის შესაძლებელია ამ მოთხოვნის განსაზღვრა.

3. ის მოთხოვნა, რომელიც უზრუნველყოფილია იპოთეკით, შეიძლება შეიცვალოს სხვა მოთხოვნით. ამისათვის საჭიროა მესაკუთრისა და კრედიტორის (იპოთეკარის) შეთანხმება და ამ შეთანხმების რეგისტრაცია რეესტრში.

საქართველოს 2007 წლის 11 მაისის კანონი #4744 – სსმ I, #18, 22.05.2007 წ., მუხ. 158.
საქართველოს 2007 წლის 29 ივნისის კანონი #5127 – სსმ I, #27, 17.07.2007 წ., მუხ. 260.

I. ზოგადი დებულებები

1

286-ე მუხლში მოცემულია იპოთეკის ლეგალური დეფინიცია და მისი, როგორც კრედიტის უზრუნველყოფის სანივთო საშუალების, დასაშვებობის წინაპირობები.[1] იპოთეკა არის აქცესორული ხასიათის სანივთო რეალიზაციის უფლება[2] და, შესაბამისად, მისი დადგენისათვის აუცილებელია უზრუნველსაყოფი მოთხოვნის არსებობა, რომელიც ე. წ. წამყვანი (უზრუნველყოფილი) მოთხოვნაა[3] და რომელთანაც განუყოფლად არის შეზრდილი იპოთეკა.[4] უზრუნველყოფილი მოთხოვნის კრედიტორი და იპოთეკარი (უზრუნველყოფილი კრედიტორი) იდენტური პირი უნდა იყოს[5] (გამონაკლისთან დაკავშირებით იხ. 297-ე მუხლის კომენტარი).

2

იპოთეკა გადაიცემა უზრუნველყოფილი მოთხოვნის დათმობის გზით (201 I, 295). უზრუნველყოფილი კრედიტორის დაკმაყოფილება იპოთეკიდან ხდება იპოთეკით დატვირთული საგნის რეალიზაციით (301, 302) ან კრედიტორის საკუთრებაში გადასვლით (300).

II. იპოთეკის დადგენის წინაპირობები

1. დადგენა

3

იპოთეკა წარმოიშობა ხელშეკრულებით ან სხვა კანონისმიერი საფუძვლით.

ა) სახელშეკრულებო იპოთეკა

4

სახელშეკრულებო იპოთეკის დადგენისათვის აუცილებელია შეთანხმება და იპოთეკის რეგისტრაცია საჯარო რეესტრში (289). მისი შეთანხმება შესაძლებელია როგორც პირობადებულად, ისე გარკვეული ვადით.[6] იპოთეკის დადგენა გულისხმობს განკარგვას და მის შემთხვევაში ძალაში რჩება განკარგვისათვის მოქმედი წესები (მაგ., 102-ე და 983-ე მუხლები).

5

გერმანულ სამართალში იპოთეკის სანივთო გარიგებისაგან გამიჯვნის პრინციპის საფუძველზე ასხვავებენ იპოთეკის (ვალდებულებით) გარიგებას (pactum de hypothecando), როგორც გარიგებას, რომელიც არის იპოთეკის უფლების მინიჭება-შენარჩუნების კაუზა.[7] იპოთეკის (ვალდებულებითი) ხელშეკრულებით, სანივთოსაგან განსხვავებით, ნივთის მესაკუთრე ან იპოთეკარი კისრულობს მხოლოდ ვალდებულებას, შემძენის სასარგებლოდ დაადგინოს (იპოთეკის დადგენის ხელშეკრულება) ან გადასცეს (იპოთეკის გადაცემის ხელშეკრულება) მას იპოთეკის უფლება.[8] ჩვეულებრივ, იპოთეკის ხელშეკრულება გახვეულია სხვა ხელშეკრულების ფორმაში, როგორიც არის, მაგალითად, სესხის ხელშეკრულება.[9]

6

ამ სანივთო-ვალდებულებითი გარიგებების დიქოტომიამ ქართულ სამართალში ჯერჯერობით თავისი ადგილი ვერ დაიმკვიდრა – მიუხედავად სანივთო გარიგების კონსტრუირების ცალკეული მცდელობებისა,[10] შეთანხმება იპოთეკის შესახებ მხოლოდ ვალდებულებითსამართლებრივ ხელშეკრულებად რჩება.[11]

ბ) კანონისმიერი იპოთეკა

{{ვ|7}] იძულებითი ღონისძიების გამოყენების ფარგლებში იპოთეკის დადგენა (მაგ. სააღსრულებო წარმოებათა შესახებ კანონის 63-ე მუხლი, საგადასახადო კოდექსის 239-ე მუხლი) არ საჭიროებს შეთანხმებას იპოთეკის მოვალესა და იპოთეკარს შორის, თუმცა ამისგან განსხვავებით, მენარდის კანონისმიერი იპოთეკა (635) მხოლოდ შესაბამისი შეთანხმების საფუძველზე წარმოიშობა[12] (იხ. მუხ. 635, მე-11 ველი).

8

რეგისტრაციის შინაარსთან დაკავშირებით იხ. 289 I მუხლი. ჩვეულებრივ, იპოთეკა დგინდება და არსებობს მხოლოდ რეგისტრირებული (რეესტრის, ანუ ჩვეულებრივი,[13] ი პოთეკა) ან, ამავდროულად, იპოთეკის მოწმობაში განსხეულებული უფლების (საბარათე იპოთეკა[14] (2891), იხ. მუხ. 2891, მე-4 ველი) ფორმით.

9

იპოთეკის აქცესორული ბუნებიდან გამომდინარე, ის უზრუნველყოფილი მოთხოვნის არწარმოშობის, გაქარწყლების ან მესაკუთრეზე გადასვლის შემთხვევაში მესაკუთრის იპოთეკად გარდაიქმნება (289).[15]

2. შინაარსი

ა) იპოთეკის საგანი

10

იპოთეკა დგინდება ერთ ან რამდენიმე (287) მიწის ნაკვეთზე,[16] ან წილზე მიწის ნაკვეთზე წილად თანასაკუთრებაში (განსხვავებით თანაზიარი საკუთრებისაგან)[17] და მიწაზე საკუთრების მსგავს უფლებებზე, როგორიცაა აღნაგობა[18] (233) ან ბინაზე საკუთრება[19] (208).

ბ) იპოთეკარის დაკმაყოფილება

11

იპოთეკარს უფლება აქვს, ხელშეკრულებით გათვალისწინებულ ფარგლებში მოითხოვოს უზრუნველყოფილი მოთხოვნის ანგარიშში იპოთეკის საგნიდან მოთხოვნის შესაბამისი თანხის გადახდა (286 I, 1-ლი ვარიანტი), იპოთეკის საგნის რეალიზაციიდან ამონაგების თანხის (301 I) ან ამ საგნის მის საკუთრებაში გადასვლა (300). რეალიზაციით დაკმაყოფილების უფლება, რომელიც სანივთო, უზრუნველყოფილი მოთხოვნისაგან გასამიჯნი, მოთხოვნაა, ხორციელდება იპოთეკით დატვირთული საგნის აუქციონზე გასხვისების მეშვეობით (302). რეალიზაციის თუ იპოთეკარის საკუთრებაში გადასვლის თავიდან აცილება შესაძლებელია მხოლოდ „იპოთეკის საგნის გამოხსნის“ (292 I, 304 I) მეშვეობით.

გ) უზრუნველყოფილი მოთხოვნა

12

იპოთეკით შესაძლებელია მხოლოდ განსაზღვრული[20] (კონკრეტული საფუძვლისა და ოდენობის მქონე) ან განსაზღვრადი ფულადი მოთხოვნისა თუ მოთხოვნების[21] უზრუნველყოფა,[22] თუმცა გამონაკლისის სახით უზრუნველყოფაუნარიანი, ასევე სამომავლო თუ პირობადებული მოთხოვნებისაც (286 II, შდრ. მუხ. 254, 24-ე ველი). არაფულადი მოთხოვნის იპოთეკით უზრუნველყოფა შეუძლებელია (შდრ. 289 I 3); ალტერნატიული ვალდებულებების შემთხვევაში საკმარისია, თუ შეპირებული შესრულებებიდან ერთ-ერთი ფულად ხასიათს ატარებს.[23] მოთხოვნის მატერიალურსამართლებრივი საფუძველი უმნიშვნელოა, რის გამოც ასევე დასაშვებია საჯაროსამართლებრივი მოთხოვნების იპოთეკით უზრუნველყოფა.[24] თუ უზრუნველსაყოფი მოთხოვნა არ არის საკმარისად განსაზღვრული, რეგისტრაციის შემდეგ იპოთეკა მესაკუთრის იპოთეკად გარდაიქმნება (288).[25]

13

თუ ეს პირდაპირ არ ეწინააღმდეგება მხარეთა დაფიქსირებულ ნებას, განმარტების საკითხი იმის დადგენაა, უზრუნველყოფს თუ არა იპოთეკა ასევე ზიანის ანაზღაურებისა და კონდიქციურ მოთხოვნებს.[26] თუმცა ამ შემთხვევაში გასათვალისწინებელია ის ზღვარი, რომელიც რეესტრის საჯაროობის ფუნქციით არის დადგენილი (შდრ. მუხ. 289, მე-11 და მომდევნო ველები).

14

შესაძლებელია, უზრუნველყოფილი მოთხოვნები სხვადასხვა მოვალის წინააღმდეგ იყოს მიმართული,[27] თუმცა ამის საპირისპიროდ, აუცილებელია, რომ მოთხოვნის კრედიტორი და იპოთეკარი ერთი და იგივე პირი იყოს[28] (გამონაკლისისათვის იხ. 297-ე მუხლის კომენტარი). უმნიშვნელოა, თუ ვინ იღებს უზრუნველყოფილი მოთხოვნით გათვალისწინებულ შესრულებას.[29]

15

დაუშვებელია ერთი და იმავე მოთხოვნის უზრუნველსაყოფად ერთი და იმავე საგნის რამდენიმე იპოთეკით დატვირთვა (ორმაგი უზრუნველყოფის აკრძალვა),[30] რადგან ეს წინააღმდეგობაში მოვიდოდა იპოთეკის აქცესორულობის პრინციპთან.[31] თუმცა ასეთი შეზღუდვა არ მოქმედებს, როდესაც უზრუნველყოფილი მოთხოვნის რამდენიმე დამოუკიდებელ ნაწილად დანაწევრებაა შესაძლებელი (მაგ.: ძირი სესხი და პროცენტები).[32]

დ) სპეციალური ფორმები

16

ერთი იპოთეკა, რომლითაც რამდენიმე საგანია დატვირთული, არის საერთო იპოთეკა, 287-ე მუხლის მიხედვით და არ ეწინააღმდეგება ორმაგი უზრუნველყოფის აკრძალვას (შდრ. ზემოთ). საერთო იპოთეკისაგან განსხვავდება ე. წ. ერთიანი იპოთეკა,[33] რა დროსაც ხდება ერთიანი მოთხოვნის უზრუნველმყოფი (სხვადასხვა საგანზე დადგენილი) რამდენიმე იპოთეკის გაერთიანება.

17

გარდა ხსენებულისა, ვალის დაფარვის მოდალიტეტის მიხედვით, გერმანულ დოქტრინაში იპოთეკის ცალკე ფორმად გამოყოფენ ე. წ. დაფარვად იპოთეკას (Tilgungshypothek), რომელიც არსობრივად ქართული იპოთეკური ბანკების შემთხვევაშიც იპოთეკის ამოსავალი ფორმაა. მის ფარგლებ- ში ასხვავებენ ე. წ. განწილვადებული გადახდისა (Abzahlungshypothek) და ვალის ამორტიზების იპოთეკას (Amortisationshypothek). ორივე შემთხვევაში კრედიტორს არა აქვს ხელშეკრულების მოშლის უფლება, თუ მოვალე პროცენტებს ვადის დაცვით ფარავს.[34] განწილვადებული გადახდის იპოთეკის შემთხვევაში მოვალე თვიურად (ან წლიურად) იხდის მყარად დადგენილ თანხას ძირი კრედიტის დასაფარავად (ამორტიზაციისათვის) და კიდევ დამატებით თანხას პროცენტების ანგარიშში. თანდათანობით, კრედიტის დაფარვასთან ერთად, მცირდება ასევე იპოთეკური ტვირთიც. ამის საპირისპიროდ, ვალის ამორტიზების იპოთეკის შემთხვევაში მოვალე თვიურად (ან წლიურად) უცვლელ თანხას იხდის, რომელიც ერთდროულად ფარავს როგორც ძირ თანხას, ისე პროცენტებს.[35] თანდათანობით, ვალის ამორტიზებასთან ერთად, სულ უფრო მცირდება პროცენტი და მის ანგარიშში გადასახდელი თანხაც ძირ კრედიტს ფარავს,[36] რის გამოც იპოთეკური ტვირთი უფრო სწრაფად მცირდება, ვიდრე განწილვადებული გადახდის იპოთეკის შემთხვევაში.[37]

18

დაფარვად იპოთეკაზე იპოთეკისათვის დადგენილი ზოგადი სანივთოსამართლებრივი რეჟიმი ვრცელდება.[38] მისგან უნდა განვასხვაოთ იდენტური ეკონომიკური ფუნქციის მქონე ვალის აღიარების იპოთეკა – იპოთეკა, რომელიც აბსტრაქტულ ვალის აღიარებას უზრუნველყოფს და (კონკრეტულ შემთხვევაში) მის უკან მდგომი სესხისა და ამ სესხის დაფარვის მოდალიტეტისაგან დამოუკიდებელია. აქედან გამომდინარე, იპოთეკის მესაკუთრის ვალდებულება განისაზღვრება მხოლოდ თავდაპირველად მითითებული თანხის მიხედვით.[39]

3. კრედიტორის დაკმაყოფილება

19

კრედიტორის დაკმაყოფილების შემთხვევაში (იხ. დაკმაყოფილებასთან დაკავშირებით 292-ე მუხლის კომენტარი), იმის მიხედვით, თუ ვინ იხდის და რის დასაფარავად, უნდა განვასხვაოთ შემდეგი შემთხვევები: არამოვალე იპოთეკარის გადახდის შემთხვევაში უზრუნველყოფილი მოთხოვნა ძალაში რჩება და მესაკუთრეზე გადადის (292 II), ხოლო იპოთეკა მესაკუთრის იპოთეკად გარდაიქმნება (288). პირადი მოვალე იპოთეკარი, ჩვეულებრივ, მოთხოვნის დასაფარავად იხდის.[40] მის მიერ კრედიტორის დაკმაყოფილების შემთხვევაში უზრუნველყოფილი მოთხოვნა წყდება (427), ხოლო იპოთეკა ამ შემთხვევაშიც მესაკუთრის იპოთეკად გარდაიქმნება. არაიპოთეკარი პირადი Mოვალე იხდის მხოლოდ მოთხოვნის დაფარვის ანგარიშში. ამ დროს უზრუნველყოფილი მოთხოვნა წყდება, ხოლო იპოთეკა ან გარდაიქმნება მესაკუთრის იპოთეკად, როგორც ზემოთ მოყვანილ შემთხვევებში, ან გადადის პირად მოვალეზე (298 II). მესამე პირის მიერ იპოთეკარის დაკმაყოფილებას- თან დაკავშირებით იხ. მუხ. 304, მე-8 და მომდევნო ველები.

20

კრედიტორის უზრუნველყოფილი მოთხოვნის დაუკმაყოფილებლობის შემთხვევაში მას აქვს იპოთეკის საგნის რეალიზაციის (301, 302) ან მასზე საკუთრების მოპოვების (300) უფლება, რის შემდეგაც ეს უფლება წყდება.[41]

III. იპოთეკით უზრუნველყოფილი მოთხოვნის შეცვლა, 286 III

21

286 III მუხლი ამარტივებს კრედიტის უზრუნველყოფას იპოთეკის მეშვეობით, ითვალისწინებს რა უზრუნველყოფილი მოთხოვნის სხვა მოთხოვნით ჩანაცვლების შესაძლებლობას გარიგების საფუძველზე, იპოთეკის გარდაქმნისა ან შეწყვეტის შემდეგ მისი თავიდან დადგენის გარეშე (286 III 1). მოთხოვნის ჩანაცვლება დასაშვებია როგორც იპოთეკარი კრედიტორის ცვლილებით, ისე მის გარეშე. ნორმა ვრცელდება ყველა ტიპის იპოთეკაზე, მათ შორის მესაკუთრის იპოთეკაზე (288).

1. მოთხოვნის შეცვლა კრედიტორის ცვლილების გარეშე

22

იპოთეკით უზრუნველყოფილი მოთხოვნის შეცვლისათვის იპოთეკის ცვლილების გარეშე საკმარისია შეთანხმება კრედიტორსა და მესაკუთრეს შორის და მისი რეგისტრაცია საჯარო რეესტრში (286 III 2). არაიპოთეკარი პირადი მოვალის თანხმობა აუცილებელი არ არის. მისი დაცვა უზრუნველყოფილია 299 II მუხლის მიხედვით. მოთხოვნის შეცვლის მომენტისათვის ეს თავდაპირველად უზრუნველყოფილი მოთხოვნა ჯერ კიდევ სახეზე უნდა იყოს (სხვა შემთხვევაში მოქმედებს 288-ე მუხლი),[42] ხოლო შემცვლელი, უზრუნველსაყოფი, მოთხოვნა უნდა აკმაყოფილებდეს 289 I მუხლის წინაპირობებს.[43]

23

იპოთეკით უზრუნველყოფილი მოთხოვნის შეცვლა შეიძლება მხოლოდ იმ შემთხვევაში, თუ ახალი მოთხოვნა ძველს არ აჭარბებს. სხვა შემთხვევაში ამ მოთხოვნის ჭარბი წილის უზრუნველყოფა უნდა მოხდეს მომდევნო რანგის იპოთეკით.[44] შესაძლებელია რანგის დათმობის შეთანხმება.[45]

24

მოთხოვნის შეცვლა არის იპოთეკის საგნისა და იპოთეკის განკარგვა (შინაარსის ცვლილება).[46] შეცვლის შემდეგ იპოთეკა მხოლოდ ახალ მოთხოვნას უზრუნველყოფს, ხოლო ძველი მოთხოვნის სამართლებრივი ბედი განისაზღვრება ზოგადი წესების მიხედვით.[47]

2. მოთხოვნისა და კრედიტორის ცვლილება

25

უზრუნველყოფილი მოთხოვნის შეცვლასთან ერთად დასაშვებია თავად იპოთეკარის ცვლილება, რაც გამომდინარეობს 286 III მუხლის განმარტებიდან. ამისათვის აუცილებელია ზემოთ ხსენებული შეთანხმება და ძველი იპოთეკარის თანხმობა, მისი ახლით ჩანაცვლებასთან დაკავშირებით.[48] თანხმობის განცხადება შეიძლება როგორც რეესტრის, ისე ახალი კრედიტორისა და მესაკუთრის წინაშე.[49] იპოთეკა ამ ხსენებული წინაპირობების შესრულების შემდეგ ავტომატურად გადადის ახალ კრედიტორზე.[50]

{{ვ|26}] აღწერილი პროცედურის ალტერნატივის სახით იპოთეკის გადაცემა შესაძლებელია უზრუნველყოფილი მოთხოვნის დათმობის გზითაც.[51] </div>




  1. იხ. იპოთეკასთან დაკავშირებით ჭანტურია, კრედიტის უზრუნველყოფის სამართალი, 2012, გვ. 60 და შემდგომი გვერდები; ჭანტურია, სკ-ის კომენტარი, წიგნი II, 1999, მუხ. 286, გვ. 248 და შემდგ.; ზოიძე, ქართული სანივთო სამართალი, 2003, გვ. 327 და შემდგ.; შნიტგერი, კრედიტის უზრუნველყოფის სამართალი საქართველოში, 2011, გვ. 8 და შემდგ.; შოთაძე, იპოთეკა, როგორც საბანკო კრედიტის უზრუნველყოფის საშუალება, 2012; შოთაძე, სანივთო სამართალი, 2014, გვ. 356 და შემდგ.; დარჯანია, იპოთეკის აქცესორულობის პრობლემატიკა საკრედიტო ხელშეკრულებებში, „სტუდენტური სამართლებრივი ჟურნალი“, 2013, გვ. 4 და შემდგ.
  2. ჭანტურია, კრედიტის უზრუნველყოფის სამართალი, 2012, გვ. 61; საქართველოს უზენაესი სასამართლოს 2014 წლის 17 თებერვლის #ას-901-859-2013 გადაწყვეტილება.
  3. RGZ 81, 268.
  4. Rohe, in Beck OK BGB, 42. Aufl., 2017, § 1113, Rn. 4.
  5. ჭანტურია, იქვე, 2012, გვ. 62, 80; საქართველოს უზენაესი სასამართლოს 2014 წლის 17 თებერვლის #ას-901-859-2013 გადაწყვეტილება.
  6. RGZ 122, 331.
  7. Bassenge, in Palandt BGB Kommentar, 75. Aufl., 2016, § 1113, Rn. 4; Lieder, in MüKo BGB, 7. Aufl., 2017, § 1113, Rn. 87.
  8. Lieder, იქვე.
  9. ჭანტურია, იქვე, გვ. 61; საქართველოს უზენაესი სასამართლოს 2014 წლის 17 თებერვლის #ას-901-859-2013 გადაწყვეტილება; BGH NJW-RR 1991, 305.
  10. შდრ. საქართველოს უზენაესი სასამართლოს 2010 წლის 25 მაისის #ას-1283-1538-09 გადაწყვეტილება; საქართველოს უზენაესი სასამართლოს 2015 წლის 30 ივლისის #ას-369-350-2015 განჩინება (4.1.9.).
  11. იხ. ამასთან დაკავშირებით, უპირველეს ყოვლისა: ჭანტურია, კრედიტის უზრუნველყოფის სამართალი, 2012, გვ. 61, 68; საქართველოს უზენაესი სასამართლოს 2014 წლის 17 თებერვლის #ას-901-859-2013 გადაწყვეტილება.
  12. ჭანტურია, იქვე, გვ. 68.
  13. ჭანტურია, იქვე, გვ. 69. იპოთეკის ამ ფორმის აღსანიშნავად ტერმინ „წიგნის იპოთეკის“ (შოთაძე, იპოთეკა, როგორც საბანკო კრედიტის უზრუნველყოფის საშუალება, 2012, გვ. 197) გამოყენება გაუმართლებელია, რადგან ეს გერმანული Buchhypothek-ის კალკია და, გამომდინარე იქიდან, რომ, გერმანიისაგან განსხვავებით, საქართველოში იპოთეკის რეგისტრაცია არა საადგილმამულო წიგნში, არამედ საჯარო რეესტრში ხდება, საკუთარ შინაარსთან არანაირი ბმა არ გააჩნია.
  14. იხ. ჭანტურია, იქვე, გვ. 69 და შემდგ.
  15. ჭანტურია, იქვე, გვ. 63.
  16. ჭანტურია, იქვე, გვ. 76; შდრ. თბილისის სააპელაციო სასამართლოს 2011 წლის 19 ოქტომბრის # 2ბ/3106-10 გადაწყვეტილება (4.7.).
  17. Wieling, Sachenrecht, 1992, § 27 I 1.
  18. საჯარო რეესტრის შესახებ კანონის 11 I ბ) მუხლი; შდრ. ამასთან დაკავშირებით იხ.: ჭანტურია, კრედიტის უზრუნველყოფის სამართალი, 2012, გვ. 79 და შემდგ.; შოთაძე, იპოთეკა, როგორც საბანკო კრედიტის უზრუნველყოფის საშუალება, 2012, გვ. 57 და შემდგ.
  19. ჭანტურია, კრედიტის უზრუნველყოფის სამართალი, 2012, გვ. 77, 78. იპოთეკის უფლება ვრცელდება ბინაზე მიშენებაზეც, როგორც დატვირთული ნივთის არსებით შემადგენელ ნაწილზე, გარდა იმ შემთხვევისა, როდესაც მიშენება ცალკე ობიექტად რეგისტრირდება. იხ. იქვე, დაუსრულებელი შენობა-ნაგებობების იპოთეკით დატვირთვასთან დაკავშირებით, ასევე, შოთაძე, იპოთეკა, როგორც საბანკო კრედიტის უზრუნველყოფის საშუალება, 2012, გვ. 54.
  20. ჭანტურია, კრედიტის უზრუნველყოფის სამართალი, 2012, გვ. 63; ჭანტურია, სკ-ის კომენტარი, წიგნი II, 1999, 286-ე მუხლი, გვ. 253; დარჯანია, იპოთეკის აქცესორულობის პრობლემატიკა საკრედიტო ხელშეკრულებებში, „სტუდენტური სამართლებრივი ჟურნალი“, 2013, გვ. 11; საქართველოს უზენაესი სასამართლოს 2012 წლის 6 მარტის #ას-1280-1300-2011 გადაწყვეტილება.
  21. Bassenge, in Palandt BGB Kommentar, 75. Aufl., 2016, § 1113, Rn. 10.
  22. BGH NJW 1994, 461.
  23. Rohe, in Beck OK BGB, 42. Aufl., 2017, § 1113, Rn. 16.
  24. Lieder, in MüKo BGB, 7. Aufl., 2017, § 1113, Rn. 16; Bassenge, in Palandt BGB Kommentar, 75. Aufl., 2016, § 1113, Rn. 17.
  25. BGH NJW 1994, 461.
  26. Rohe, in Beck OK BGB, 42. Aufl., 2017, § 1113, Rn. 17; შდრ. ასევე, ჭანტურია, კრედიტის უზრუნველყოფის სამართალი, 2012, გვ. 64.
  27. Lieder, in MüKo BGB, 7. Aufl., 2017, § 1113, Rn. 42; RGZ 126, 277.
  28. საქართველოს უზენაესი სასამართლოს 2000 წლის 2 ივნისის # 3კ-198-2000 განჩინება; BayObLG NJW 1958, 1918.
  29. BayObLG NJW 1958, 1918.
  30. ჭანტურია, იქვე, გვ. 73.
  31. RGZ 131, 20; OLG Köln NJW-RR 1996, 1107; Rohe, in Beck OK BGB, 42. Aufl., 2017, § 1113 Rn. 17.
  32. RGZ 131, 21.
  33. Rohe, იქვე, Rn. 24.
  34. Wieling, Sachenrecht, 1992, § 26 I 2 a.
  35. BGH NJW 1977, 100.
  36. Rohe, in Beck OK BGB, 42. Aufl., 2017, § 1113, Rn. 25.
  37. Wieling, Sachenrecht, 1992, § 26 I 2 a bb; ამორტიზაციის იპოთეკის მოდიფიცირებად უნდა აღვიქვათ იპოთეკური სესხის შეთანხმება ვალის დაფარვის ე.წ. ოფსეტფუნქციით ქართული ბანკების პრაქტიკაში, რაც იძლევა საშუალებას, მსესხებელმა გარკვეული დროით ანგარიშზე განთავსებული თანხის მეშვეობით შეამციროს პროცენტის ხარჯები.
  38. BGH NJW 1977, 100; Rohe, in Beck OK BGB, 42. Aufl., 2017, § 1113, Rn. 26.
  39. Rohe, იქვე, Rn. 28.
  40. BGHZ 7, 126.
  41. Rohe, in Beck OK BGB, 42. Aufl., 2017, § 1113, Rn. 36.
  42. KG JW 1936, 3131; Lieder, in MüKo BGB, 7. Aufl., 2017, § 1180, Rn. 5.
  43. RGZ 147, 302.
  44. Rohe, იქვე, § 1180, Rn. 4.
  45. RG JW 1934, 479.
  46. Lieder, იქვე, Rn. 1.
  47. Rohe, იქვე, Rn. 5.
  48. Rohe, in Beck OK BGB, 42. Aufl., 2017, § 1180, Rn. 6.
  49. Bassenge, in Palandt BGB Kommentar, 75. Aufl., 2016, § 1113, Rn. 3.
  50. KG JW 1935, 3570.
  51. RGZ 147, 301.


დატოვეთ კომენტარი
თქვენ შეგიძლიათ კომენტარის დატოვება ანონიმურად. თუ არ გსურთ ანონიმურობა, გაიარეთ რეგისტრაცია ან ავტორიზაცია.

Retrieved from "http://civilcode.ge/index.php?title=მუხლი_286._ცნება&oldid=2159"